வெண்டைக்காய் வறுத்தது - சமையல் குறிப்பு

பச்சையாகவே சாப்பிடும் காய்களில் எனக்குப் பிடித்தவைகளில் ஒன்று...வெண்டைக்காய். அதுவும் செடியிலிருந்து பறித்து உடனே கடித்து சாப்பிட்டால் அது ஒரு சுவை.

அதை வறுத்து......வித்தியாசமாக வறுத்து சாப்பிட்டால் சுவையோ சுவை!
தேவையான அளவு வெண்டைக்காய்கள், பிஞ்சாக பொறுக்கி நுனி உடைத்துப் பார்த்து வாங்கவும்.

உடைத்த பின் முத்தல் என்று கூடையிலே திருப்பிப் போட்டால்
கடைகாரர் மனம் உடைந்துவிடும். ஆகவே நிச்சயம் பிஞ்சென்று தெரிந்து உடைத்து வாங்கவும்.
அப்படி வாங்கிய வெண்டைக்காய்களை நன்கு கழுவி சுத்தம் செய்து, ரெண்ட்டிஞ்சு நீளத்தில் நறுக்கி
அதன் நடுவில் சிறு கத்தி கொண்டு அயிலயிலாகக் கீறிக்கொள்ளவும்.

அட! பத்து வெண்டைக்காய்கள் சேர்ந்து ஒரு வெண்டைக்காயை கீறுகிறதே!!!!

அப்புரம்....கடாயை அடுப்பிலேற்றி அதில் மஞ்சள்பொடி, மிளகாய்பொடி, சீரகப்பொடி, தனியாப்பொடி, மிளகுப்பொடி, உப்பு, நம்ம பருப்புபொடி...அதாங்க, பொட்டுக்கடலை, வேர்கடலை, முந்திரி, பாதாம் சேர்த்து அரைத்த பொடி!

எல்லாப் பொடிகளையும் போடவும்

சிறிது எண்ணை ஊற்றி அவற்றை நன்கு கிளறவும்.

அதில் நறுக்கி, கீறிய வெண்டைக்காய்களை போட்டு நன்கு பிரட்டவும்.

அப்பப்ப சிறிது எண்ணை ஊற்றி மொறுமொறுவென்று வரும் வரை கிளறிக்கொண்டேயிருக்கவும்.
கடைசியில் சிறிது நெய் விட்டு பருப்புப்பொடி, சர்க்கரை தூவி பிரட்டி எடுக்கவும்.

சர்க்கரை எதுக்கு? இனிப்புக்காக அல்ல, எந்த காய் வறுத்தாலும் இறுதியில் சிறிது சர்க்கரை தூவி வறுத்தால், அதிக மொறுமொறுப்பாயிருக்கும். ''நோட் திஸ் பாயிண்ட் யுவர் ஆனர்!!!'

இதோ..மொறு மொறு வெண்டைக்காய் வறுத்தது ,வறுத்து ரெடி!

சுவைத்துப் பார்க்க விறுவிறுவென்று வாருங்கள்!!!!!